மகாராஷ்டிரா மாநிலம் மும்பையில் பா.ஜ.க கூட்டணியில் சிவசேனாவும்(ஏக்நாத் ஷிண்டே), பா.ஜ.கவும் தலா 3 தொகுதியில் போட்டியிடுகின்றன. தாராவி பகுதிக்கு உள்பட்ட தென்மத்திய மும்பை தொகுதியில் சிவசேனா சார்பாக ராகுல் ஷெவாலே போட்டியிடுகிறார். இதே தொகுதியில் மற்றொரு சிவசேனா(உத்தவ்) சார்பாக அனில் தேசாய் போட்டியிடுகிறார். அனில் தேசாயை ஆதரித்து விடுதலை சிறுத்தைகள் கட்சித்தலைவர் தொல் திருமாவளவன் கடந்த சில நாள்களுக்கு முன்பு தாராவியில் பரப்புரையாற்றினார்.
இந்நிலையில் ராகுல் ஷெவாலேயை ஆதரித்து தமிழ்நாடு பா.ஜ.க தலைவர் கே.அண்ணாமலை தாராவியில் நடந்த பொதுக்கூட்டத்தில் கலந்து கொண்டு பேசினார். இதில் முதல்வர் ஷிண்டேயும் கலந்து கொண்டு பேசினார். அண்ணாமலை தொடர்ந்து மும்பையில் தமிழர்கள் அதிகம் இருக்கும் பகுதியில் பரப்புரையாற்றி வருகிறார். நேற்று அண்ணாமலையோடு பா.ஜ.கவின் நடிகர் சரத்குமாரும் கலந்து கொண்டார். சரத்குமார் நேற்று மாலையில் முதலில் தாராவியில் ரோடு ஷோ நடத்தினார். அதனை தொடர்ந்து மும்பையின் ஒரே தமிழ் எம்.எல்.ஏ.வான கேப்டன் தமிழ்செல்வம் சயான் கோலிவாடாவில் ஏற்பாடு செய்திருந்த பிரசார கூட்டத்தில் சரத்குமாரும், அண்ணாமலையும் கலந்து கொண்டனர்.
இக்கூட்டத்தில் சரத்குமார் தமிழியில் பேசுவார் என்று அனைவரும் எதிர்பார்த்தனர். ஆனால் இந்தியில் பேசி சரத்குமார் அனைவரையும் ஆச்சரியப்படுத்தினார். சரத்குமார் தனது உரையில் பிரதமர் மோடி தலைமை நாட்டிற்கு தேவை என்றும், பிரதமரின் சாதனைகள் குறித்தும் பேசினார்.
அதனை தொடர்ந்து பேசிய தமிழக பாஜக மாநில தலைவர் அண்ணாமலை, தமிழ், இந்தி, ஆங்கிலம் என்று முன்று மொழிகளின் கலவையில் பேசினார். பிரதமர் ஆட்சிக்கு வந்த பிறகு ஏழைகளுக்கு எத்தனை இலவச வீடுகள் கட்டிக்கொடுக்கப்பட்டுள்ளது என்பது குறித்தும், மீண்டும் ஆட்சிக்கு வந்தால் பிரதமர் என்னவெல்லாம் செய்வார் என்று பேசினார். அதோடு ஏற்கெனவே நடந்து முடிந்த தேர்தலில் தங்களது கட்சிக்கு பெரும்பான்மை இடங்கள் கிடைத்துவிட்டதாக நம்பிக்கை தெரிவித்தார். பொதுக்கூட்டம் நடந்த இடம் தமிழர்கள் குறைவாக வசிக்கும் இடம் என்பதால் இருவரும் இந்தியில் பேசினர்.
Junior Vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும்… https://tinyurl.com/crf99e88
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://tinyurl.com/crf99e88