புதுச்சேரி சட்டமன்றப் பொதுத் தேர்தலுக்கான வாக்குப்பதிவு ஏப்ரல் 9-ம் தேதி நடைபெற இருக்கிறது. இந்நிலையில் வேட்பாளர்களின் சொத்து மற்றும் குற்ற வழக்குகள் தொடர்பாக அறிக்கை ஒன்றை வெளியிட்டிருக்கிறார் புதுச்சேரி தேர்தல் கண்காணிப்பகம் ஒருங்கிணைப்பாளர் ஜோசப் விக்டர் ராஜ்.
அந்த அறிக்கையில், `வேட்பாளர்களின் பிரமாண பத்திரங்களை ஆய்வு செய்து அறிக்கையாக வெளியிடும் பணியை, கடந்த 2011-ம் ஆண்டு முதல் ஆறு தேர்தல்களாக செய்து வருகிறது புதுச்சேரி தேர்தல் கண்காணிப்பகம். அதன்படி புதுச்சேரி 2026 சட்டமன்றத் தேர்தலில் 30 தொகுதிகளில் 294 பேர் போட்டியிடுகின்றனர்.
அதில் தேசிய கட்சிகளைச் சேர்ந்த 34 பேரும், மாநிலக் கட்சிகளைச் சேர்ந்த 63 பேரும், பதிவு செய்யப்பட்ட அங்கீகரிக்கப்படாத கட்சிகளைச் சேர்ந்த 80 பேரும், சுயேச்சையாக 117 வேட்பாளர்களும் போட்டியிடுகின்றனர்.
அவர்களில் 291 வேட்பாளர்களின் சுய உறுதிமொழி வாக்குமூலங்கள் ஆய்வு செய்யப்பட்டன. அதில் 66 பேர் (23%) மீது கிரிமினல் வழக்குகள் நிலுவையில் உள்ளன. 28 பேர் (13%) மீது கொலை, கொலை முயற்சி, திருட்டு மற்றும் பெண்களுக்கு எதிரான குற்றங்கள் போன்ற கடுமையான கிரிமினல் வழக்குகள் உள்ளன.
இரண்டு வேட்பாளர்கள் மீது கொலை வழக்கும் (IPC 302), மூன்று வேட்பாளர்கள் மீது பெண்ணை மானபங்கப்படுத்திய வழக்குகளும் நிலுவையில் உள்ளன.
குறிப்பாக காங்கிரஸ் கட்சியில் மூன்று பேர், என்.ஆர்.காங்கிரஸ் கட்சியில் நான்கு பேர், பா.ஜ.க-வில் ஐந்து பேர், தி.மு.க-வில் ஆறு பேர், அ.தி.மு.க-வில் ஒருவர் என 19 வேட்பாளர்கள் மீது கிரிமினல் வழக்குகள் நிலுவையில் உள்ளன. அதேபோல மொத்த வேட்பாளர்களில் 119 பேர் அதாவது 41 சதவிகிதம் பேர் கோடீஸ்வரர்கள்.
என்.ஆர்.காங்கிரஸ் சார்பில் போட்டியிடும் 16 வேட்பாளர்களும், பா.ஜ.க சார்பில் 10 வேட்பாளர்களும், ல.ஜ.க சார்பில் போட்டியிடும் இரண்டு வேட்பாளர்களும் கோடீஸ்வரர்கள். அதேபோல காங்கிரஸ் சார்பில் போட்டியிடும் 21 பேரில் 17 பேர் கோடீஸ்வர்கள்.
இந்த வேட்பாளர்களின் சராசரி சொத்து மதிப்பு 7.21 கோடி. பெரும் பணக்காரர்களாக ல.ஜ.க வேட்பாளர் ஜோஸ் சார்லஸ் மார்டின் ரூ.609 கோடி சொத்துகளுடன் முதலிடத்திலும், பா.ஜ.க மாநிலத் தலைவர் ராமலிங்கம் ரூ.115 கோடிகளுடன் இரண்டாம் இடத்திலும், அமைச்சர் நமச்சிவாயம் ரூ.85 கோடியுடன் மூன்றாம் இடத்திலும் உள்ளனர்.
அதேபோல் அதிக ஆண்டு வருவாய் உள்ளவர்களில் ரூ.59 கோடியுடன் ஜோஸ் சார்லஸ் முதலிடத்திலும், ரூ.6 கோடியுடன் பா.ம.க கோபாலகிருஷ்ணன் இரண்டாம் இடத்திலும் இருக்கின்றனர்.
அதேபோல ரூ.1 கோடியுடன் சுயேச்சை வேட்பாளர் வசந்தகுமார் மூன்றாம் இடத்திலும் இருக்கிறார். மேலும் வேட்பாளர்களில் 134 பேர் பட்டப்படிப்பு மற்றும் அதற்கு மேலும் படித்தவர்கள். 125 வேட்பாளர்கள் 5 முதல் 12-ம் வகுப்பு வரை படித்தவர்கள்.
25 பேர் பட்டயப்படிப்பு முடித்தவர்களாகவும், 4 பேர் முற்றிலும் படிக்காதவர்களாக உள்ளனர். வேட்பாளர்களில் 61 முதல் 80 வயதுடையவர்கள் 53 பேர். அதேபோல் 41 முதல் 60 வயது வரை 165 பேர் உள்ளனர். 25 முதல் 40 வயது வரை 73 பேர் உள்ளனர்.
இந்த தேர்தலில் மொத்தம் 40 பெண்கள் போட்டியிடுகின்றனர்’ என்று குறிப்பிட்டிருக்கும் புதுச்சேரி தேர்தல் கண்காணிப்பகக் குழு, `கொலை, பாலியல் வன்கொடுமை, ஆள் கடத்தல் உள்ளிட்ட கொடூரமான குற்றங்களுக்காக தண்டிக்கப்பட்டவர்களை தேர்தல் ஆணையம் தகுதி நீக்கம் செய்ய வேண்டும்’ என்று பரிந்துரைத்திருக்கிறது.
Disclaimer :- This story is generated by computerised program and has not been created or edited by Daily Mail Hub. Publisher : VIGADAN